பொற்றாமரைத் திருக்குளம் : ஸ்ரீ சார்ங்கபாணிக் கோயிலின் தீர்த்தங்கள் பொற்றாமரைக்குளம், காவேரி, அரிசல் ஆறு முதலியன ஸ்ரீ சார்ங்கபாணிக் கோயிலின் தீர்த்தங்கள் ஆகும். பொற்றாமரையின் வேறு பெயர்கள் இத்தீர்த்ததிற்கு ஹேம புஷ்கரணி, லெக்ஷ்மி தீர்த்தம், அமுதத் தீர்த்தம் என்று வேறு பெயர்களும் உள்ளன. பெயர்க் காரணம் பொற்றாமரை எனும் இக்குளத்தில் பொன் தாமரையில் கோமளவல்லி குழந்தையாக அவதரித்ததால் இது பொற்றாமரைக் குளம் எனவும், அமிர்தக் குடம் சிவபெருமானால் சிதைந்த போது குடத்தில் இருந்த அமிர்தத் துளிகள் இக்குளத்தில் சிந்தியதால் இது அமுதக்குளம் எனவும், இத்திருக்குளத்தில் இலக்குமியான கோமளவல்லி ஆயிரம் இதழ்களுடன் கூடிய பொன்மயமான தாமரைப் பூவிலிருந்து அவதாரம் செய்தபடியால் லெக்ஷ்மி தீர்த்தம் எனவும் கூறுவர். பொற்றாமரைத் திருக்குளம் அமைப்பு ஸ்ரீ சார்ங்கபாணித் திருக்கோயிலின் மேலைக்கோபுரவாசல் எதிரே வெளிப்புறம் பொற்றாமரைக் குளம் அமைந்துள்ளது. பொற்றாமரைக் குளத்தின் நடுவே நீராழி மண்டபம் உள்ளது. இதில் பதினாறு தூண்கள் உள்ளதால் பதினாறு கால் மண்டபம் என்றும் இது அழைக்கப்படுகிறது. குளத்தின் மேற்பகுதியின் நான்கு மூலைகளிலும் நாலுகால் மண்டபங்கள் நான்கு உள்ளன. வடக்குப் படித்துறையில் கோமளவல்லித் தாயார், ஹேம மகரிஷி சந்நதிகள் உள்ளன. பொற்றாமரைக் குளம் 2 ஏக்கர் நிலப்பரப்பில் அமைந்துள்ளது. இதன் கீழ்மேல் நீளம் 370 அடி, அகலம் (தென்வடல்) 257 அடி ஆகும். தேவாரத்தில் இக்குளம் பற்றி நாவுக்கரசர் கீழ்க்கண்டவாறு பாடுகின்றார். சரசுவதி பொற்றாமரைப் புட்கரணி (ஆறாம் திருமறை 75-6) அச்சுதப்ப மன்னர் காலத்தில் சார்ங்கபாணித் தீர்த்தங்களில் ஒன்றான காவிரி நதியின் பயன்பாட்டை நன்குணர்ந்து மன்னரின் ஆலோசனைப்படி கோவிந்த தீட்சதரே காவேரியின் கரைகளின் ஆங்காங்கே படித்துறைகளையும், மண்டபங்களையும் அமைத்தார். பொற்றாமரை தோன்றிய வரலாறு சிவபெருமானின் உத்திர தாண்டவத்தின் காரணமாகக் கும்பம் சிதைந்த போது குடத்தில் இருந்த நீர் இரண்டு பிரிவாகச் சிதறியது. ஒன்று கும்பகோணம் மகாமகத் திருக்குளம், மற்றொன்று பொற்றாமரைத் திருக்குளமாகும். பொற்றாமரைப் புட்கரணி திருக்குளத்தின் கிழக்குத் துறையின் படிக்கட்டுகளின் ஒரு துண்டுக் கல்வெட்டுள்ளது. சக ஆண்டு 1556 ஸ்ரீமுக வருடம் வைகாசி மாதம் குறிக்கப்பெற்ற இத்தெலுங்கு சாசனம் இரகுநாத நாயக்கரின் நன்மைக்காகச் செய்யப்பெற்ற அறக்கட்டளை பற்றிய ஒரு பகுதி மட்டும் உள்ளது. இக்கல்வெட்டு கி.பி.1633 ஆம் ஆண்டு மே மாதம் எழுதப் பெற்றது என்பதறியலாம். பலன்கள் மாசிமக நாளில் பெருமாளின் தெப்ப உற்சவம் நடைபெறுகின்றது. சித்திரைப் பருவத்திலும், கார்த்திகை சோமவாரத்திலும், அமாவாசை அன்று இத்தீர்த்தத்தில் ஸ்நானம் செய்பவர் அளவிலாச் செல்வமும் வளமும் பெற்று வாழ்வர். இக்குளத்தில் நீராடுபவர்களுக்கு அனைத்து நலன்களும் கிடைக்கும் என்று தலவரலாறு கூறுகின்றது. மிகக் கொடிய பாவம் செய்தோர் இத்தீர்த்தத்தில் மூழ்கினால் நற்பேறு பெறுவர் என்பது நம்பிக்கை. எமனுக்கு மோட்சம் அளித்த கோமளவல்லியை மணந்து இத்தலத்திலே சார்ங்கபாணி சிறக்க அமர்ந்ததால் சார்ங்கபாணிக்கே இப்பொற்றாமரைக்குளம் சொந்தமாயிற்று. மகாமகப் பெருவிழாவில் மகாமகக் குளத்திலும், ஸ்ரீ சார்ங்கபாணிக் கோயில் தீர்த்தமான பொற்றாமரைக் குளத்திலும், காவேரி ஆற்றிலும் ஆக இந்த மூன்று தீர்த்தத்திலும் நீராடி பாவத்தை நீக்கி புண்ணியம் தேட மக்கள் திருக்குடந்தை நோக்கி பன்னிரண்டு வருடத்திற்கு ஒருமுறை வருகை தருகிறார்கள். இத்திருக்கோயிலின் பொற்றாமரை தீர்த்தமானது மகாமகப் பெருவிழாவில் மிகவும் இன்றியமையாததாகும்.